เหตุนา อิมินา นเยน อิมินา อนุมาเนน ญาตพฺพํ อตฺถิ โส ภควาติ ฯ อยํ สเทวโก
โลโก สีลคนฺเธน สุฉุปิโต ฯ ภวติห
อนุมาเนน ชานนฺติ ฆายิตฺวา คนฺธุตฺตมํ
ปวายติ ยถา คนฺโธ เหสฺสนฺติ ปุปฺผิตา ทุมา
ตเถวิทํ สีลคนฺธํ ปวายติ สเทวเก
อนุมาเนน ญาตพฺพํ อตฺถิ พุทฺโธ อนุตฺตโรติ ฯ
เอวรูเปน โข มหาราช การเณสหสฺเสน เหตุสหสฺเสน นยสหสฺเสน น สกฺกา
อุปทสฺสยิตุํ พุทฺธพลํ ปริทีปยิตุํ ฯ ยถา มหาราช นานาปุปฺผราสี ภเวยฺย ตเมนํ กุสโล
มาลากาโร มาลาการนฺเตวาสี วา โย ชโน กุสโล อาจริยมนุสตฺถิยา ปจฺจตฺตปุริสกาเรน
วิจิตฺตํ มาลํ คนฺเถยฺย วิชฺชมาเนสุ ปุปฺเผสุ เอวเมว โข มหาราช โส ภควา วิจิตฺต-
ปุปฺผราสิมิว อเนกวณฺณอเนกสตสหสฺสวณฺณอสงฺเขยฺโย อปฺปเมยฺโย อหเมตรหิ ชินสา
สนมาลกาโร วิย ปุพฺพกานํ อาจริยานํ วิเสนปิ มยฺหํ คนฺถมติพุทฺธิยา อสงฺเขยฺเยนปิ
การเณน อนุมาเนน พุทฺธพลํ ทีปยิสฺสามิ ตเถวเมตฺถ ตฺวํ มหาราช ฉนฺทํ ชเนหีติ ฯ
ทุกฺกรํ ภนฺเต นาคเสน อญฺเญสํ เอวรูเปน อนุมาเนน ปฏิรูปเกน พุทฺธพลํ
อุปทสฺสยิตุํ อตฺตโนปิ ตตฺถ ปริปณฺณสงฺกปฺโป ตว พุทฺธพลํ ปริทีเปน ฯ นิพฺพุโตสฺมิ
ภนฺเต นาคเสน ตุมฺหากํ ปรมวิจิตฺเตน ปญฺหายฺยากรเณนาติ ฯ

อนุมานปญฺโห อฏฺฐโม ฯ

ปสฺสตารญฺญิเก ภิกฺขู อชฺโฌคาฬฺเห ธุตงฺคุเณ
ปุน ปสฺสติ คิหี ราชา อนาคามิผเล ฐิเต
อุโภปิ เต จินฺตยิตฺวา อุปฺปชฺชิ สํสโย มหา
ยทิ พุชฺฌติ คิหี ธมฺเม นิรตฺถํ โหติ ธุตงฺคณํ
ปรวาทิวาทมถนํ นิปุณํ สาสนํ ธรํ
หนฺท ปุจฺฉามิ กถิเสกฺฐํ โส เม กงฺขํ วิเนสฺสตีติ ฯ
อถ โข มิลินฺโท ราชา หฏฺโฐ ตุฏฺโฐ ปมุทิโต อุทคฺโค อานนฺทิโต สุมโน
เวทชาโต อายูหฺโต อุยฺยาโต ฉนฺทชาโต ปีติโต ปฏิปนฺโน โอกนฺโต วิมติปถํ ตาริตุกาโม

โคโณ วิย ปิปาสิโต อุทกคามี ฉาโต วิย ปุริโส โภชนํ คเวสี ปณฺโฐโกว สตฺถํ ปฏิมานิ
อาตุโร วิย ภึสกํ ปริเยสี อธโน วิย นิธึ คเวสี จ ตรโณ วิย นาวาปฏกงฺขิโก กามุโก
วิย ปิยสมาคมิจฺฉิ วาทิโต วิย วิสทฺทกาโม ภีโต วิย สรณํ คเวสี ชินปุตฺโต วิย วิมุตฺติกาโม
ตุริตตุริโต เถรํ นาคเสนมุปสงฺกมิ ฯ ภวติห
ปิปาสิโต ยถา โคโณ ฉาโตว โภชนตฺถิโก
คามิโกว สตฺถปฏิมานี อาตุโรว ติกิจฺฉกํ
อธโนว นิธึ คเวสิ นาวํว ปารคามิโก
ภีโตว สรณํ คเวสิ วาทิโก วิสทฺทเมสิ
ภีโตว สรณํ คเวสิ ชินปุตฺโต วิย นิพฺพุตนฺติ ฯ
เอวํ มิลินฺโท ราชา วิมติตริตุกาโม เถรํ นาคเสนํ อุปสงฺกมิ อุปสงฺกมิตฺวา
จ ปน มิลินฺโท ราชา กวินา สทฺธึ สาราณียํ อนุปเวเทตฺวา ทสวิธํ คุณวรํ
สมนุปสฺสิตฺวา ปุจฺฉติ นิสฺสํสโย ภวิสฺสามิ วิมติปถํ วีติวตฺโต วิสุทฺธํ เม มานสํ ภวิสฺสติ
อโนวทฺธพฺยาปคโต กุวิตกฺโก ภวิสฺสามิ ธมฺมโสตํ สมาปนฺโน ปญฺญาจกฺขุํ ปฏิลภิสฺสามิ
อาจริยมนุปวิฏฺโฐ โอกมฺปิโต ภวิสฺสามิ ปตฺถิโต สพฺพกุสลานํ ธมฺมานํ นิราวรโณ ภวิสฺสามิ
โลกุตฺเตเรหิ ธมฺเมหิ อนุสฺสโต ภวิสฺสามิ สพฺพภเวหิ อภีโต ภวิสฺสามิ ปริสนฺตรํ คโต
ขิปฺปํ ทสฺสนํ ภวิสฺสามิ ธมฺมํ ปฏิเวธิตุนฺติ ฯ อิเม ทสวิเธ คุณวเร สมนุปสฺสิตฺวา
ปุจฺฉติ
ภนฺเต นาคเสน อตฺถิ โกจิ คิหีภูโต อคาริโก กามโภคี ปุตฺตทารสมฺพาธสยนํ
อชฺฌาวนฺโต กาสิกจนฺทนํ ปจฺจนุโภนฺโต มาลาคนฺธวิเลปนํ ธารยนฺโต ชาตรูปรชกํ สาทิยนฺโต
มณิมุตฺตากาญฺจนโมลึ พนฺธนฺโต โย สนฺตํ ปรมติถํ นิพฺพานํ สจฺฉิกโรตีติ ฯ นตฺถิ มหาราช
เอกญฺเญว สตํ น เทฺว สตานิ น จ สหสฺสานิ น จ สตสหสฺสานิ น โกฏิสตานิ
น โกฏิสหสฺสานิ น โกฏิสตสหสฺสานิ ฯ ติฏฺฐิตุ มหาราช ทสนฺนํ วีสติยาา สตสฺส
อภิสมโย กตเมน เต ปริยาเยน อนุดยคํ ทมฺมีติ ฯ ตฺวเมเวตํ ปตฺถิตํ พฺรูหีติ ฯ
เตนหิ มหาราช เต กถยิสฺสามิ สเตน วา สหสฺเสน วา สหสหสฺเสน วา โกฏิยา
วา โกฏิสเตน วา โกกิสหสฺเสน วา ฯ ยา กาจิ นวงฺเค พุทฺธสาสเน สลฺเลขิ
ตาจารปฏิปตฺติธุตคุณวรงฺคนิสฺสิตา กถา ตา สพฺพา อิธ สโมสรนฺติ ฯ ยถา นาม มหาราช
นินฺนุนฺนตสมวิสมถลชลเทสภาเค อภิวุฏฺฐํ อุทกํ ตํ สพฺพํ ตโต นิวตฺติตฺวา มโหทธึ สาครํ

โอสริ เอวเมว โข มหาราช สมฺปาทเก สติ ยา กาจิ นวงฺคพุทฺธวจเน สลฺเลขิ
ตาจารปฏิปตฺติธุตคุณวรงฺคนิสฺสิตา กถา ตา สพฺพา อิธ สโมสรนฺติ ฯ มยฺหเมตฺถ มหาราช
ปริพยตฺตตาย วุทฺธิยา การณปริทีปนํ สโมสริสฺสติ เตเนโส อตฺโถ สุวิภตฺโต สุวิจิตฺโต
ปริปุณฺโณ ปูริตสมติตฺโต ภวิสฺสติ ฯ ยถา มหาราช กุสโล เลขาจริโย อนุสิฏฺโฐ เลขํ
โอสาราเปนฺโต อตฺตโน ปริพฺยตฺตตาย วุทฺธิยา การณปริทีปเนน เลขํ ปริปูเรติ เอวเมว
มยฺหเมตฺถ ปริพฺยตฺตตาย วุทฺธิยา การณปริทีปนํ สโมสริสฺสติ เตเนโส อตฺโถ สุวิภตฺโต
สุวิจิตฺโต ปริปุณฺโณ ปูริตสมติตฺโต ภวิสฺสติ ฯ
นคเร มหาราช สาวตฺถิยํ ปญฺจโกฏิมตฺตา อริยสาวกา ภควโต อุปาสก-
อุปาสิกาโย สตฺตปญฺญาส สหสฺสานิ ตีณิ จ สตสหสฺสานิ อนาคามิผเล ปติฏฺฐิตานิ เตปิ
สพฺเพ คิหีภูตา น ปพฺพชิตา ฯ ปุน จ ตตฺเถว คณฺฑามฺพมูเล วีสติ ปาณ-
โกฏิโย ฯ ปุน จ ราหุโลวาเท มหามงฺคลสุตฺตนฺเต สมจิตฺตปริยาเย ปราภวสุตฺตนฺเต
จูฬสุภทฺทาสุตฺตนฺเต กลหวิวาทสุตฺตนฺเต จูฬพฺยูหสุตฺตนฺเต มหาพฺยูหสุตฺตนฺเต ตุวกกสุตฺตนฺเต
สารีปุตฺตสุตฺตนฺเต คณนปถมตีตานํ เทวตานํ ธมฺมาภิสมโย อโหสิ ฯ นคเร ราชคเห
ปญฺญาส สหสฺสานิ ตีณิ สตสหสฺสานิ อริยสาวกา ภควโต อุปาสกอุปาสิกาโย ปุน ตตฺเถว
ธนปาลหตฺถินาคทมเน นวุติ ปาณโกฏิโย ฯ ปรายนสมาคเม ปาสาณาเก เจติเย จุทฺทส
ปาณโกฏิโย ฯ ปุน อินฺทสาลคุหายํ อสีติ เทวตาโกฏิโย ฯ ปุน พาราณสิยํ อิสิปตเน
มิคทาเย ปฐเม ธมฺมเทสเน อฏฺฐารส พฺรหฺมโกฏิโย อปริมาณา จ เทวตาโย ฯ ปุน
ตาวตึสภวเน ปณฺฑุกมฺพลสิลายํ อภิธมฺมเทสนาย อสีติ เทวตาโกฏิโย ฯ เทโวโรหเน
สงฺกสฺสนครทฺวาเร โลกวิวรณปาฏิหาริเย ปสนฺนานํ นรมรูนํ ตึส โกฏิโย อภิสมึสุ ฯ
ปุน สกฺเกสุ กปิลวตฺถุสฺมึ นิโคฺรธาราเม พุทฺธวํสเทสนาย มหาสมยสุตฺตนฺตเทสนาย จ
คณนปถมตีตานํ เทวตานํ ธมฺมาภิสมโย อโหสิ ฯ ปุน สุมนมาลาการสมาคเม
ครหทินฺนสมาคเม อานนฺทเสกฺฐิสมาคเม ชมฺพุกาชีวกสมาคเม มณฺฑูกเทวปุตฺตสมาคเม
มฏฺฐกุณฺฑลิเทวปุตฺตสมาคเม สุลสานครโสภินิสมาคเม สิริมานครโสภินิสมาคเม เปสการ-
ธีตุสมาคเม จูฬสุภทฺทาสมาคเม สาเกตพฺราหฺมณสฺส อาฬาหนทสฺสนสมาคเม สุนาปรนฺตก-
สมาคเม สกฺกปญฺหสมาคเม ติโรกุฑฺฑสมาคเม รตนสุตฺตสมาคเม ปจฺเจกํ จตุราสีติยา
ปาณสหสฺสานํ ธมฺมาภิสมโย อโหสิ ฯ ยาวตา มหาราช ภควา โลเก อฏฺฐาสิ โสฬสสุ
มหาชนปเทสุ ยตฺถ ยตฺถ ภควา วิหาสิ ตตฺถ ตตฺถ เยภุยฺเวน เทฺว ตโย จตฺตาโร

ปญฺจ ทส เทวมนุสฺสา สตํ จ สหสฺสํ จ สตสหสฺสํ จ เต สพฺเพ สนฺตํ ปรมตฺถํ
นิพฺพานํ สจฺฉิกรึสุ ฯ เย เต มหาราช เทวา คิหีเยว เต น ปพฺพชิตา ฯ เอตานิ
จ มหาราช อญฺญานิ จ อเนกานิ เทวตาโกฏิสตสหสฺสานิ คิหี อคาริกา กามโภคิโน
สนฺตํ ปรมตฺถํ นิพฺพานํ อจฺฉิกรึสูติ ฯ
ยทิ ภนฺเต นาคเสน คิหี อคาริกา กามโภคิโน สนฺตํ ปรมตฺํ นิพฺพานํ
สจฺฉิกโรนฺติ อถ อิมานิ เตรส ธุตงฺคคุณานิ กิมตฺถํ สาเธนฺติ เตน การเณน
ธุตงฺคคุณานิ อกิจฺจกรานิ โหนฺติ ฯ ยทิ ภนฺเต นาคเสน มนฺตปริชปฺปเนน พฺยาธิโย
อุปสเมนฺติ ถึ ปน วเรจเนน มนฺตมนุสฺเสน ฯ ยทิ มุฏฺฐีหิ ปฏิสตฺตุํ นิคฺคโห ภวติ
กึ อสิสตฺติสรจาปโกทณฺฑทพฺพิทณฺฑลคุฬมุคฺคเรหิ ฯ ยทิ คณฺฐิกุฏิลสุสิรกฏฺฐสาขนฺธเนน
รุกฺขมภิรูหนํ ภวติ กึ ทีฆทฬฺหสุพทฺธนิสฺเสณิปริเยสเนน ฯ ยทิ ถนฺทิลเสยฺยาย ธาตุสมตา
ภวติ กึ สุขุมสมฺผสฺสมหติมหาสิริยนปริเยสเนน ฯ ยทิ เอโก สาสงฺกสภยวิสมกนฺตาร-
ตารณสมตฺโถ ภวติ กึ สนฺนทฺธสชฺชนสหายมหาสตฺถปริเยเสน ฯ ยทิ นทึ สกพาหาย
ตริตุํ สมตฺโถ ภวติ กึ ปน ธุวเสตุธุวนาวาปริเยเสน ฯ ยทิ สกสนฺตเกน ฆาสจฺฉาโท
ภวติ กึ ปรเสวนาปิยสมุลฺลาปปจฺฉาปุเรธาวเนน ฯ ยทิ อขาตตฬาเก อุทกํ ลภติ กึ
อุทปานตฬากโปกขรณิขณเนน ฯ เอวเมว โข ภนฺเต นาคเสน ยทิ คิหี อคาริกา กามโภคี
สนฺตํ ปรมตฺถํ นิพฺพานํ สจฺฉิกโรนฺติ กึ ธุตงฺคคุณวรสมาทิยเนนาติ ฯ
กฏฺฐวีสติ โข ปนิเม มหาราช ธุตงฺคคุณา ยถาภุจฺจธุตงฺคคุณา เยหิ คุเณหิ
ธุตงฺคํ สพฺพพุทฺธานํ ปิหิตํ ปตฺถิตํ ฯ กตเม อฏฺฐวีสติ ฯ อิธ มหาราช ธุตงฺคคุณํ
สุทฺธาชีวํ สุขผลํ อนวชฺชํ ปรสฺส ทุกฺขาปนุทํ อภยํ อสมฺปีฬํ เอกนฺตวุทฺธิกํ อปริหานิยํ
อมายํ อนาวิลํ อารกฺขํ ปตฺถิตททํ สพฺพสตฺตธุปนํ สํวรหิตํ ปฏิรูปํ อติสนฺตํ วิปฺปมุตฺตํ
ราคกฺขยํ โทสวูปมสนํ โมหวินาสนํ มานปวาหนํ กุวิตกฺกเฉชฺชการณํ กงฺขาวิตรณํ
โกสชฺชวิทฺธํสนํ อรติปวาหนํ ขมนํ อตุลํ อปฺปมาณํ สพฺพทุกฺชกฺชยคามินนฺติ ฯ อิเม
โข มหาราช อฏฺฐวีสติ ธุตงฺคคุณา ยถาภุจฺจธุตงฺคคุณา เยหิ คเณหิ ธุตงฺคํ สพฺพพุทฺธานํ
ปิหิตํ ปตฺถิตํ ฯ
เย โข เต มหาราช ธุตงฺคคุเณ สมาทาย เสวนฺติ เต อฏฺฐารสหงฺเคหิ สมุเปตา
ภวนฺติ ฯ กตเมหิ อฏฺฐารสหิ ฯ อาจาโร เตสํ สุวิสุทฺโธ โหติ ปฏิปทา สุปูริตา
โหติ กายิกวาจสิกํ สุรกฺขิตํ โหติ มโน สุวิสุทฺโธ โหติ วิริยํ สุปคฺคหิตํ โหติ ภยํ วูปสมติ

อตฺตานุทิฏฺฐิพฺยปคตา โหติ อาฆาโต วูปสนฺโต โหติ เมตฺตา อุปฏฺฐิตา โหติ อาหาโร
ปริญฺญาโต โหติ สพฺพสตฺตานํ ครุกโต โหติ โภชเน มตฺตญฺญู โหติ ชาคริยมนุยุตฺโต
โหติ อนิเกโต โหติ ยตฺถ ผาสุ ตตฺถ วิหารี โหติ ปาปเชคุจฺฉี โหติ วิเวการาโม โหติ
สตตํ อปฺปมตฺโต โหติ ฯ เย เต มหาราช ธุตงฺคคุเณ สมาทาย เสวนฺติ เต อิเมหิ
อฏฺฐารสหิ องฺเคหิ สุมเปตา ภวนฺติ ฯ
ทส อิเม มหาราช ปุคฺคลา ธุตงฺคคุณารหา ฯ กตเม ทส ฯ สทฺโธ หิริมา
ธิติมา อกุโห อตฺถวสี อโลโล สิกฺขากาโม ทฬฺหสมาทาโน อนุชฺฌานพหุโล เมตฺตา-
วิหารี ฯ อิเม โข มหาราช ทส ปุคฺคลา ธุตงฺคคุณารหา ฯ
เย เต มหาราช คิหี อคาริกา กามโภคิโน ฯ เป ฯ สนฺตํ ปรมตฺถํ นิพฺพานํ
สจฺฉิกโรนฺติ เต สพฺเพ ปุริมาสุ ชาตีสุ เตรสสุ ธุตงฺคคุเณสุ กตุปาสนา กตภูมิกมฺมา
เต ตตฺเถวาจารญฺจ ปฏิปตฺติญฺจ โสธยิตฺวา อชฺเชตรหิ คิหีเยว สนฺตา สนฺตํ ปรมตฺถํ
นิพฺพานํ สจฺฉิกโรนฺติ ฯ ยถา มหาราช กุสโล อิสฺสตฺโถ สิสฺโส ปฐมํ ตาว อุปาสนสาลายํ
จาปเภทจาปาโรปนคหณมุฏฺฐิปฏฺปีฬนองฺคุลินามปาทฐปนสรคหณสนฺทหนอากฑฺฒนสนฺถารณ-
ลกฺขนิยมนขิปเน ติณปุริสกฉณกติณปลาลมตจฺติกาปุญฺชผลกลกฺขเวเธ อนุสิกฺขิตฺวา รญฺโญ
สนฺติเก อุปาสนํ ทสฺเสตฺวา ราชานํ อาราธยิตฺวา อาชญฺญรถคชตุรงฺคธนธญฺญหิรญฺญ-
สุวณฺณทาสิกาสภริยาคามนิคมวรํ ลภติ เอวเมว โข มหาราช เย เต คิหี อคาริกา
กามโภคี ฯ เป ฯ สนฺตํ ปรมตฺถํ นิพฺพานํ สจฺฉิกโรนฺติ เต สพฺเพ ปุริมาสุ ชาตีสุ
เตรสธุตงฺคคุเณสุ กตุปาสนา กตภูมิกมฺมา เต ตตฺเถวาจารญฺจ ปาฏิปตฺติญฺจ โสธยิตฺวา
อชฺเชตรหิ คิหีเยว สนฺตา สนฺตํ ปรมตฺถํ นิพฺพานํ สจฺฉิกโรนฺติ ฯ น มหาราช ปุพฺเพ
ธุตงฺคคุณาเสวเนน วินา ตาเยว ชาติยา อรหตฺตํ สจฺฉิกิริยา โหติ ฯ อุตฺตเมน วิริเยน
อุตฺตมาย ปฏิปตฺติยา ตถารูเปน อาจาเรน โสตาปตฺติผลํ สจฺฉิกิริยา โหติ ฯ ยถา
วา ปน มหาราช ภึสโก สลฺลกนฺโต ปุพฺเพ อาจริยํ ธเนน วา วตฺตปฏิปตฺติยา วา
อาราธยิตฺวา สตฺถคฺคหณวเสน เลขนเฉทนสลฺลุทฺธรณวณโธวนโสสนเภสชฺชานุเลปนวิมน-
วิเรจนานุวาสนสํโยชนกิริยํ อนุสิกฺขิตฺวา วิชฺชาสุ กตสิกฺโข กตุปาสโน สิกฺขิตหตฺถ กทาจิ
อาตุเร อุปสงฺกมติ ติกิจฺฉาย เอวเมว โข มหาราช คิหี อคาริกา กามโภคิโน สนฺตํ
ปรมตฺถํ นิพฺพานํ สจฺฉิกโรนฺติ เต สพฺเพ ปุริมาสุ ชาตีสุ เตรสธุตงฺคุเณสุ กตุปาสนา
กตภูมิกมฺมา เต ตตฺเถวาจารญฺจ ปฏิปตฺติญฺจ โสธยิตฺวา อชฺเชตรหิ คิหีเยว สนฺตา สนฺตํ

ปรมตฺถํ นิพฺพานํ สจฺฉิกโรนฺติ ฯ น มหาราช ธุตงฺคคุเณน อวิสุทฺธานํ ธมฺมาภิสมโย
โหติ ฯ ยถา มหาราช อุทกสฺส อเสจเนน วีชานํ อนารุโห ภวติ เอวเมว โข มหาราช
ธุตงฺคคุเณน อวิสุทฺธานํ ธมฺมาภิสมโย น โหติ ฯ ยถา วา ปน มหาราช อกตกุสลานํ
สุคติคมนํ น โหติ เอวเมว โข มหาราช ธุตงฺคคุเณน อวิสุทฺธานํ ธมฺมาภิสมโย น
โหติ ฯ
ปฐวีสมํ มหาราช ธุตงฺคคุณํ วิสุทฺธกามานํ ปติฏฺฐานตฺเถน ฯ อาโปสมํ มหาราช
ธุตงฺคคุณํ วิสุทฺธกามานํ สพฺพกิเลสมลโธวนตฺเถน ฯ เตโชสมํ มหาราช ธุตงฺคคุณํ
วิสุทฺธิกามานํ สพฺพกิเลสวนชฺฌาปนตฺเถน ฯ วาโยสมํ มหาราช ธุตงฺคคุณํ วิสุทฺธกามานํ
สพฺพกิเลสรโชปวาหนฺเถน ฯ อคทสมํ มหาราช ธุตงฺคคุณํ วิสุทฺธกามานํ สพฺพกิเลส-
พฺยาธิวูปสมนตฺเถน ฯ อมตสมํ มหาราช ธุตงฺคคุณํ วิสุทฺธกามานํ สพฺพกิเลส-
วินาสนตฺเถน ฯ เขตฺตสมํ มหาราช ธุตงฺคคุณํ วิสุทฺธกามานํ สพฺพสามญฺญคุณสสฺส-
วิรูหนตฺเถน ฯ มโนหรสมํ มหาราช ธุตงฺคคุณํ วิสุทฺธิกามานํ สพฺพปตฺถิตสมฺปตฺติ-
ททตฺเถน ฯ นาวาสมํ มหาราช ธุตงฺคคุรํ วิสุทฺธิกามานํ อณฺณวตรณสํสารปาร-
คมนตฺเถน ฯ ภีรุตาณสมํ มหาราช ธุตงฺคคุรํ วิสุทฺธิกามานํ ชรามรณภยภีตานํ
อสฺสาสกรณตฺเถน ฯ มาตุสมํ มหาราช ธุตงฺคคุณํ กิเลสทุกฺขปฏิปีฬิตานํ อนุคฺคห-
กตฺเถน ฯ ปิตุสมํ มหาราช ธุตงฺคคุณํ วิสุทฺธกามานํ กุสลวุฑฺฒิกามานํ สพฺพ-
สามญฺญชนกตฺเถน ฯ มิตฺตสมํ มหาราช ธุตงฺคคุณํ วิสุทฺธิกามานํ สพฺพสามญฺญ-
ปริเยสนอวิสํวาทกตฺเถน ฯ ปทุมสมํ มหาราช ธุตงฺคคุณํ วิสุทฺธิกามานํ สพฺพกิเลเสหิ
อนูปลิตฺตตฺเถน ฯ จตุชาติวรคนฺธสมํ มหาราช ธุตงฺคคุณํ วิสุทฺธิกามานํ กิเลสทุคฺคนฺธ-
ปฏิวิโนทนตฺเถน ฯ คิริราชวรสมํ มหาราช ธุตงฺคคุณํ วิสุทฺธิกามานํ อฏฺฐโลกธมฺเมหิ
อกมฺปิยตฺเถน ฯ อากาสสมํ มหาราช ธุตงฺคคุณํ วิสุทฺธิกามานํ สพฺพตฺถคหณาปคต-
อุรุวิสฏวิตฺถตมหนฺตตฺเถน ฯ นชฺโชสมํ มหาราช ธุตงฺคคุณํ วิสุทฺธิกามานํ กิเลสมล-
ปวาหนตฺเถน ฯ เทสกสมํ มหาราช ธุตงฺคคุณํ วิสุทฺธิกามานํ ชาติกนฺตารกิเลสทิฏฺฐิ-
วิสมอภินีหรณตฺเถน ฯ มหาสตฺถวาหสมํ มหาราช ธุตงฺคคุณํ วิสุทฺธิกามานํ สพฺพภย-
สุญฺญเขมอภยปวรปุรนิพฺพานนครสมฺปาปนตฺเถน ฯ วิมลวรปริสุทฺธิสนิทฺธสุมชฺชิตอาทาสสมํ
มหาราช ธุตงฺคคุณํ วิสุทฺธิกามานํ สงฺขารานํ สภาวทสฺสนตฺเถน ฯ ผลกสมํ มหาราช
ธุตงฺคคุณํ วิสุทฺธิกามานํ กิเลสลคุฬสรสตฺติปฏิพาหนตฺเถน ฯ จนฺทสมยํ มหาราช

ธุตงฺคคุณํ วิสุทฺธิกามานํ อริยานํ อิจฺฉิตปตฺถิตมนาปตฺเถน ฯ สุริยสมํ มหาราช ธุตงฺคคุณํ
วิสุทฺธิกามานํ สพฺพตมติมิรวิทฺธํสนตฺเถน ฯ
เอวํ โข มหาราช ธุตงฺคคุรํ พหูปการํ หิตกรํ ผาสุกรํ ปิยกรํ อวชฺชกรํ
วหิกรํ ปติฏฺฐิตํ ยสาวหํ สุขาหารํ สุขวิปากํ คุณราสิ คุณปุญฺชํ อปริมิตวรคุณํ สพฺพตฺถ
ปวรคฺคกฺฐานํ ภยนุทํ โสกนุทํ ทุกฺขนุทํ ทรถนุทํ ปริฬาหนุทํ อรตินุทํ ภวนุทํ ขิลนุทํ
ราคนุทํ โทสนุทํ โมปนุทนํ ทิฏฺฐินุทํ สพฺพอกุสลธมฺมนุทํ ฯ
ยถา มหาราช มนุชา อุปตฺถมฺภวเสน โภชนํ อุปเสวนฺติ หิตวเสน เภสชฺชํ
อุปเสวนฺติ อุปการวเสน มิตฺตํ อุปเสวนฺติ โอตารณวเสน นาวํ อุปเสวนฺติ สุคนฺธวเสน
มาลาคนธํ อุปเสวนฺติ อภยวเสน ภีรุตาณํ อุปเสวนฺติ ปติฏฺฐานวเสน ปฐวึ อุปเสวนฺติ
สิปฺปวเสน อาจริยํ อุปเสวนฺติ ยสวเสน ราชานํ อุปเสวนฺติ กามททวเสน
มณิรตนํ อุปเสวนฺติ เอวเมว โข มหาราช สพฺพสามญฺญททวเสน อริยา ธุตงฺคคุณํ
อุปเสวนฺติ ฯ
ยถา วา ปน มหาราช อุทกํ พีชวิรูหนาย อคฺคิ ฌาปนาย อาปาโร พลาหรณาย
ลตา พนฺธนาย สตฺถํ เฉทนาย ปานียํ ปิปาสวินยาย นิธิ อสฺสาสกรณาย นาวา ตรณาย
เภสชฺชํ พฺยาธิวูปสมาย ยานํ สุขคมนาย ภีรุตาณํ ภยวิโนทนาย ราชา อารกฺขกตฺถาย
ผลกํ ทณฺฑเลฑฺฑุลคุฬสรสตฺติปฏิพาหนาย อาจริโย อนุสาสนาย มาตา โปสนาย อาทาโส
อาโลกนาย อลงฺกาโร โสภนาย วตฺถํ ปฏิจฺฉาทนาย นิสฺเสณิ อาโรหนาย ตุลา นิกฺขิปนาย
มนฺตํ ชปฺปนาย อาวุธํ ตชฺชนิยปฏิพาหนาย ปทีโป อนฺธการหนาย วาโต ปริฬาหน
นิพฺพาปนาย สิปฺปํ วุตฺตินิพฺพตฺตนาย อคทํ ชีวิตรกฺขนาย อากโร รตนุปฺปาทาย รตนํ
อลงฺการาย อาณา อนติกฺกมาย อิสฺสริยํ วสวตฺตนาย เอวเมว โข มหาราช ธุตงฺคคุณํ
สามญฺญพีชวิรูหนาย กิเลสมลฌาปนาย อิทฺธิพลาหรณาย สติสํวรนิพนฺธนาย วิมติวิจิกิจฺฉา-
สลฺลวิโนทนาย ตณฺหาปิปาสวีนยาย อภิสมยอสฺสาสกรณาย จตุโรฆตรณาย กิเลสพฺยาธิ-
วูปสมนาย นิพฺพานสุขลหุคมนาย ชาติชราพฺยาธิมรณโสกปริเทวทุกฺขโทมนสฺสอุปายาส-
สพฺพภยสนฺตาสวูปสมนาย สามญฺญคุณปริรกฺขณาย กุวิตกฺกิเลสปฏิพาหนาย เกวลสกล-
สามญฺญมนุสาสนาย สพฺพสามญฺญวรโปสนาย สมถวิปสฺสนามคฺคผลนิพฺพานทสฺสนาย
สกลโลกถูตโถมิตมหติโสภคุณกรณาย สพฺพาปายปิทหนาย สามญฺญตฺถเสลสิขรมุทฺธนิ-

อภิรูหนาย วงฺกกุฏิลวิสมจิตฺตปฏิวตฺตนิกฺขิปนาย เสวิตพฺพาเสวิตพฺพธมฺมสชฺฌายกรณาย
สพฺพกิเลสสตฺตุตชฺชนาย มหาอวิชฺชนฺธการฆาตนาย ติวิธคฺคิสนฺตาปปริฬาหนิพฺพาปนาย
สนฺตสุขุมสมาปตฺติสาธนาย จตุสจฺจาภิสมยนิพฺพตฺตนาย สีลสมนฺตเกวลสกลสามญฺญ-
ปริรกฺขณาย ฉฬภิญฺญาวรรตนอุปฺปาทาย โยคิชนาลงฺกรณาย อนวชฺชนิปุณสุขุมปณีตสนฺติสุขํ
อนติกฺกมาย เกวลสกลสามญฺญอริยธมฺมวสวตฺตนาย ฯ อิติปิ มหาราช อิเมสํ คุณานํ
อธิคมาย ยทิทํ เอกเมกํ ธุตงฺคคุณํ ฯ เอวํ มหาราช อตุลํ ธุตงฺคคุณํ อปฺปเมยฺยํ
อสมํ อปฺปฏิสมํ อปฺปฏิภาคํ อุตฺตมํ อนุตฺตรํ เสฏฺฐํ วิสิฏฺฐํ อธิกํ อายตํ ปุถุลํ วิสฏํ
วิตฺถตํ วิสาลํ วิตฺถินฺนํ ครุกํ มหนฺตํ ฯ
โย โข มหาราช ปุคฺคโล ปาปิจฺโฉ อิจฺฉาปกโต กุสโก ลุทฺโธ โอทริโก ลาภกาโม
ยสกาโม กิตฺติกาโม อยุตฺโต อปฺปตฺโต อนนุจฺฉวิโก อนรโห อปฺปฏิรูโป ธุตงฺคคุณํ
สมาทิยติ ฯ โส ทิคุณํ ทณฺฑมาปชฺชติ สพฺพคุณฆาตมาปชฺชติ ทิฏฺฐธมฺมิกญฺจ
สมฺปรายิกญฺจ ฯ ทิฏฺฐธมฺมิกํปิ หีฬนํ ขีลนํ ครหนํ อุปฺปณฺฑนํ ขิปนํ อสมฺโภค
นิสฺสารณํ นิจฺฉุภณํ ปวาหนํ ปวชฺชนํ ปฏิลภติ ฯ สมฺปราเยปิ สตโยชนิเก อวีจิ-
มหานิรเย อุณฺหกฐิตตตฺตสนฺตตฺตอจฺจิชาลามาลเก อเนกวสฺสสตสหสฺสานิ อุทฺธมโธ ติริยํ
เผณุทฺเทหกํ สมฺปริวตฺตกํ ปจฺจติ ตโต มุจฺจิตฺวา มหนฺเตหิ กาเยหิ ภีมรูเปหิ
อสุทฺธปนสูสิรรูเปหิ สูนุทฺธุมาตสุสิรุตฺตมงฺโค ฉาโต ปิปาสิโต ปจฺฉโต จ ปุรโต จ
อสมฺปโยครูปวณฺโณ ภคฺคกณฺณโสโต อุมฺมิลิตนิมฺมิลิตเนตฺตนยโน อรุคตฺตปกฺกคตฺโต
ปุฬวากิณฺณสพฺพกาโย มตสุนขปฏิกฺกุโล วาตมุเข วิย อคฺคิกฺขนฺโธ อนฺโต ชลมาโน
ปชฺชลมาโน อเลโณ อสรโณ การุญฺญํ ปริเทวมาโน มหาเปโต นิชฺฌามตณฺหิโก หุตฺวา
อาหิณฺฑมาโน มหิยา อฏฺฏสรํ กโรติ ฯ ยถา มหาราช โย โกจิ ชโน อยุตฺโต อปฺปตฺโต
อนนนุจฺฉวิโก อนรโห อปฺปฏิรูโป หีโน กุชาติโก ขตฺติยาภิเสเกน อภิสิญฺจติ โส ลภติ
หตฺถจฺเฉทํ ปาทจฺเฉทํ หตฺถปาทจฺเฉทํ กณฺณจฺเฉทํ นาสจฺเฉทํ กณฺณนาสจฺเฉทํ
วิลงฺคถาลิกํ สงฺขมุณฺฑิกํ ราหุมุขํ โชติมาลิกํ หตฺถปฺปชฺโชติกํ เอรกวตฺติกํ จีรกวาสิกํ
เอเณยฺยกํ พฬิสมํสิกํ กหาปณกํ ขาราปฏิจฺฉกํ ปลิฆปริวตฺตกํ ปลาลปีฐกํ ตตฺเตน เตเลน
โอสิญฺจนํ สุนขขาทาปนํ ชีวสูลาโรปนํ อสินา สีสจฺเฉทํ อเนกวิหิตํ กมฺมกรณํ กฏุกํ
อนุภวติ ฯ กึ ตตฺถ การณํ ฯ อยุตฺโต อปฺปตฺโต อนนุจฺฉวิโก อนรโห อปฺปฏิรูโป
หีโน กุชาติโก มหนฺเต อิสฺสริยกฺฐาเน อตฺตานํ ฐเปสิ เกวลํ ฆาเตสิ ฯ เอวเมว โข

มหาราช โย โกจิ ปาปิจฺโฉ ฯ เป ฯ มหิยา อฏฺฏสรํ กโรติ ฯ
โย ปน มหาราช ยุตฺโต ปตฺโต อนุจฺฉวิโก ปฏิรูโป อรโห อปฺปิจฺโฉ สนฺตุฏฺโฐ
วิวิตฺโต อสํนสฏฺโฐ อารทฺธวิริโย ปหิตตฺโต อสโฐ อมาโย น โอทริโก น ลาภกาโม น
ยสกาโม น กิตฺติกาโม สทฺโธ สทฺธาย ปพฺพชิโต ชรามรณา วิมุจฺจิตุกาโม ชินสาสนํ
ปคฺคณฺหามีติ ธุตงฺคคุณํ สมาทิยติ โส ทิคุณํ ปูชํ อรหติ เทวานญฺจ มนุสฺสานญฺจ ปิโย
โหติ มนาโป ปิหิโต ปตฺถิโต ชาติสุมนมลฺลิกาทิปุปฺผํ วิย นหาตานุลิตฺตสฺส ชิฆจฺฉิตสฺส
วิย ปณีตโภชนํ ปิปาสิตสฺส วิย สีตลวิมลมธุรปานียํ วิสคตสฺส วิย โอสถวรํ สีฆคมนกามสฺส
วิย อาชญฺญรถวรุตฺตมํ ปตฺติกามสฺส วิย สีฆยานํ พหุวิวิธอตฺถกามสฺส วิย มโนหรมณิรตนํ
เกฬิตุกามสฺส วิย ปญฺจางฺคปวรตุริยํ อภิรมิตุกามสฺส วิย นาฏกตณํ อภิสิญฺจิตุกามสฺส
วิย ปณฺฑรวิมลปวรเสตจฺฉตฺตํ ธมฺมกามสฺส วิย อรหตฺตผลาธิคมนมุตฺตมํ ฯ ยํ กิญฺจิ
ชินสาสนํ อคฺควรํ ยสสุขสํวตฺตนํ ฯ ตสฺส จตฺตาโร สติปฏิฐานา ภาวนาปาริปูรึ คจฺฉนฺติ
จตฺตาโร สมฺมปฺปธานา จตฺตาโร อิทฺธปาทา ปญฺจินฺทฺริยานิ ปญฺจ พลานิ สตฺต โพชฺฌงฺคา
อริโย อฏฺฐงฺคิโก มคฺโค ภาวนาปาริปูรึ คจฺฉติ สมถวิปสฺสนา อธิคจฺฉติ ปฏิเวธํ ปฏิมาเนติ
จตฺตาริ สามญฺญผลานิ จตสฺโส ปฏิสมฺภิทา ติสฺโส วิชฺชา ฉฬภิญฺญาโย เกวโล จ
สมณธมฺโม สพฺเพ ตสฺสาเธยฺยา โหนฺติ วิมุตฺติปณฺฑรวิมลเสตจฺฉตฺเตน อภิสิญฺจติ ฯ ยถา
มหาราช รญฺโญ ขตฺตยสฺส อภิชาตกุลกุลินสฺส ขตฺติยาภิเสเกน อภิสิตฺตสฺส ปริจรนฺติ
สรฏฺฐเนคมชานปทภฏพลตฺถา อฏฺฐตึสา จ ราชปุริสา นฏนจฺจกวิคณมุขมงฺคลิกา
โสตฺถิวาจกา สมณพฺราหฺมณปาสณฺฑคณา อภิคจฺฉนฺติ ยํ กิญฺจิ ปฐวิยา ปฏฺฏนรตนากร-
ตฬากรสุงฺกฏฺฐานเวรชฺชกเฉชฺชเภชฺชชนมนุสาสนํ สพฺพตฺถ สามิโก ภวติ เอวเมว โข มหาราช
โย โกจิ ปุคฺคโล ยุตฺโต ปตฺโต ฯ เป ฯ วิมุตฺติปณฺฑรวิมลเสตจฺฉตฺเตน อภิสิญฺจติ ฯ
เตรสิมานิ มหาราช ธุตงฺคคุณานิ เยหิ สุทฺธิกโต มหานิพฺพานสาครํ ปวิสิตฺวา
พหุวิธธมฺมกีฬมภิกีฬติ รูปารูปอฏฺฐสมาปตฺติโย วลญฺเชติ อิทฺธิวิธํ ทิพฺพโสตธาตุํ
ปรจิตฺตวิชานนํ ปุพฺเพนิวาสานุสฺสตึ ทิพฺพจกฺขุํ สพฺพาสวกฺขยญฺจ ปาปุณาติ ฯ กตมานิ
เตรส ฯ ปํสุกูลิกงฺคํ เตจีวริกงฺคํ ปิณฺฑปาติกงฺคํ ปทานจาริกงฺคํ เอกาสนิกงฺคํ
ปตฺตปิณฺฑิกงฺคํ ขลุปจฺฉาภตฺติกงฺคํ อารญฺญิกงฺคํ รุกฺขมูลิกงฺคํ อพฺโภกาสิกงฺคํ โสสานิกงฺคํ
ยถาสนฺถติกงฺคํ เนสชฺชิกงฺคํ ฯ อิเมหิ โข มหาราช เตรสธุตงฺคคุเณหิ ปุพฺเพ อาเสวิเตหิ
นิเสวิเตหิ จิณฺเณหิ ปริจิณฺเณหิ อุปธาริเตหิ ปริปูริเตหิ เกวลํ สามญฺญํ ปฏิลภติ

ตสฺสาเธยฺยา โหนฺติ เกวลา สนฺตา สุขา สมาปตฺติโย ฯ
ยถา มหาราช สธโน นาวิโก ปฏฺฏเน สุฏฺฐุ กตสุงฺโก มหาสมุทฺทํ ปวิสิตฺวา
วงฺคํ ตกฺโกลํ จีนํ โสวีรํ สุรฏฺฐํ อลสนฺทํ โกลปฏฺฏนํ สุวณฺณภูมึ คจฺฉติ อญฺญํปิ ยํ
กิญฺจิ นาวาสญฺจรณํ เอวเมว โข มหาราช อิเมหิ เตรสธุตงฺคคุเณหิ ปุพฺเพ อาเสวิเตหิ
นิเสวิเตหิ จิรฺเณหิ ปริจิณฺเณหิ อุปธาริเตหิ ปริปูริเตหิ เกวลํ สามญฺญํ ปฏิลภติ
ตสฺสาเธยฺย โหนฺติ เกวลา สนฺตา สุขา สมาปตฺติโย ฯ
ยถา วา ปน มหาราช กสโก ปฐมํ เขตฺตโทสํ ติรกฏฺฐปาสาณํ อปเนตฺวา
กสิตฺวา วปิตฺวา สมฺมา อุทกํ ปเวเสติวา รกฺขิตฺวา โคเปตฺวา ลวนมทฺทเนน พหุธญฺญโก
ภวติ ตสฺสาเธยฺย โหนฺติ เย เกจิ อวเสสา อธนา กปณา ทลิทฺทา ทุคฺคตชนา เอวเมว
โข มหาราช อิเมหิ เตรสธุตงฺคคุเณหิ ปุพฺเพ อาเสวิเตหิ นิเสวิเตหิ ฯ เป ฯ เกวลา สนฺตา
สุขา สมาปตฺติโย ฯ
ยถา วา ปน มหาราช ขตฺติโย มุทฺธาวสิตฺโต อภิชาตกุลกุลิโน เฉชฺช-
เภชฺชชนมนุสาสเน อิสฺสโร โหติ วสวตฺติโก สามิโก อิจฺฉากรโณ เกวลา จ มหาปฐวี
ตสฺสาเธยฺยา โหติ เอวเมว โข มหาราช อิเมหิ เตรสธุตงฺคคุเณหิ ปุพฺเพ อาเสวิเตหิ
นิเสวิเตหิ จิณฺเณหิ ปริจิณฺเณหิ อุปธาริเตหิ ปริปูริเตหิ ชินสาสนวเร อิสฺสโร โหติ
วสวตฺติโก สามิโก อิจฺฉากรโณ เกวลา จ สมณคุณา ตสฺสาเธยฺยา โหนฺติ ฯ
นนุ มหาราช เถโร อุปเสโน วงฺคนฺตปุตฺโต สลฺเลขธุตงฺคคุเณ ปริปูริการิตาย
อนาทยิตฺวา สาวตฺถิยํ สงฺฆสฺส กติกํ สปริโส นรวสภํ ปฏิสลฺลานคตํ อุปสงฺกมิตฺวา สิรสา
ภควนฺตํ อภิวาเทตฺวา เอกมนฺตํ นิสีทิ ฯ ภควา จ ตํ สุวินีตํ ปริสํ โอโลเกตฺวา หฏฺโฐ
ตุฏฺโฐ ปมุทิโต ปริสาย สทฺธึ สลฺลาปํ สลฺลปิตฺวา อาสภิวจเนน อิทมโวจ ปาสาทิกา
วต ตฺยายํ อุปเสน ปริสา กถํ ตฺวํ อุปเสน ปริสํ วิเนสีติ ฯ โสปิ สพฺพญฺญุนา
ทสพเลน เทวาติเทเวน ปุฏฺโฐ ตุฏฺโฐ หฏฺโฐ ปมุทิโต ยถาสภาวยถาภูตคุณวเสน ภควนฺตํ
เอตทโวจ โย โกจิ มํ ภนฺเต อุปสงฺกมิตฺวา ปพฺพชฺชํ วา นิสฺสยํ วา ยาจติ ตมหํ
เอวํ วทามิ อหํ โข อาวุโส อารญฺญิโก ปิณฺฑปาติโก ปํสุกูลิโก เตจีวริโก สเจ ตฺวํ
อารญฺญิโก ภวิสฺสสิ ปิณฺฑปาติโก ปํสุกูลิโก เตจีวริโก เอวาหํ ตํ ปพฺพาเชสฺสามิ นิสฺสยํ
ทสฺสามีติ สเจ โส เม ภนฺเต ปฏิสุณิตฺวา นนฺทติ น โอรมติ เอวาหํ ตํ ปพฺพาเชมิ

นิสฺสยํ เทมิ โน เจ นนฺทติ โอรมติ น ตํ ปพฺพาเชมิ น นิสฺสํสยํ ทมฺมิ เอวาหํ
ภนฺเต ปริสํ วิเนมีติ ฯ เอวํปิ มหาราช ธุตงฺคคุณวรสมาทินฺโน ภิกฺขุ ชินสาสเน อิสฺสโร
โหติ วสวตฺติโก สามิโก อิจฺฉากรโณ ตสฺสาเธยฺยา โหนฺติ เกวลา สนฺตา สุขา
สมาปตฺติโย ฯ
ยถา มหาราช ปทุมํ นาม อภิวุตฺถํ ปุพฺเพ ปริสุทฺธอุทิจฺจชาติวีชปฺปภวตาย
ทสคุณสมุเปตํ ฯ กตเม ทส ฯ สินิทฺธํ มุทุ สุภนิยํ สุคนฺธปิยํ ปตฺถิตํ ปสฏฺฐํ
ชลกทฺทมานุปลิตฺตํ อนุปตฺตเกสรกณฺณิกาหิ มณฺฑิตํ ภมรคณเสวิตํ สีตลสลิลสํวทฺธํ ฯ อิทํ
ทสคุณสมุเปตํ ปทุมํ ฯ เอวเมว โข มหาราช อิเมหิ เตรสธุตงฺคคุเณหิ ปุพฺเพ อาเสวิเตหิ
นิเสวิเตหิ จิณฺเณหิ ปริจิณฺเณหิ อุปธาริเตหิ ปริปูริเตหิ อริยสาวโก ตึสคุณวเรหิ สมุเปโต
ภวติ ฯ กตเมหิ ตึสคุณวเรหิ ฯ สินิทฺธมุทุมทฺทวเมตฺตจิตฺโต โหติ ฯ ฆาติตหตวิคตกิเลโส
โหติ ฯ หตนิหตมานทิฏฺโฐ โหติ ฯ อจลทฬฺหนิวิฏฺฐนิพฺเพมติกสทฺโธ โหติ ฯ ปริปุณฺณ-
ปินิตปหฏฺฐสุพฺภนีโย โหติ ฯ นิยตสนฺตสุขสมาปตฺติโย โหติ ฯ อจลสีลปวรอสมสุจิ-
คนฺธปริภาวิโต โหติ ฯ เทวมนุสฺสาน ปิโย โหติ ฯ ขีณาสวพลวนฺติ โหติ ฯ
อริยวรปุคฺคลชินสาสนปตฺถิโต โหติ ฯ ภูวี จ โหติ ทิวี จ เทวมนุสฺสานํ ฯน อสุรานํ
วนฺทิตปูชิโต โหติ ฯ อนคฺฆชนานํ ธุวถวิตโถมิตหสฏฺโฐ โหติ ฯ อิธ ภูวี จ ทิวี จ
โลกมนุปลิตฺโต โหติ ฯ อปฺปโถกอนุวชฺเช ภยทสฺสาวี โหติ ฯ สมฺปตฺติวรวิปุลกามานํ
มคฺคผลปวรตฺถสาธโน โหติ ฯ อายาจิตวิปุลปณีตปจฺจยภาคี โหติ ฯ อิทมตฺถิตสรีรายปิ
อนิเกตสยนกามี โหติ ฯ ฌานชฺฌายิตปวรวิหารี โหติ ฯ วิชฏิตชาลกิเลสวตฺถุวิทฺธํสิต-
ภคฺคสงฺกุฏิตสญฺฉินฺนคตินีวรโณ โหติ ฯ อกุปฺปธมฺเม อภินิปฺปวาโส โหติ ฯ อนวชฺชิตโภคี
โหติ ฯ คติวิมุตฺโต ฯ อุตฺติณฺณสพฺพวิจิกิจฺโฉ ฯ วิมุตฺติชฺฌายิตตฺโต ฯ ทิฏฺฐธมฺเม
อจลทฬฺหภีรุตฺตาณมนุปคโต ฯ อนุสยสมุจฺฉินฺโน ฯ สพฺพาสวกฺขยปฺปตฺโต ฯ สนฺต-
สุขสมาปตฺตึ ปฏิลภติ ฯ สมณคุณสมุเปโต โหติ ฯ อิเมหิ ตึสคุณวเรหิ สมุเปโต
โหติ ฯ
นนุ มหาราช เถโร สารีปุตฺโต ทสสหสฺสมฺหิ โลกธาตุยา อคฺคปุริโส ฐเปตฺวา
ทสพลํ โลกุตฺตราจริยํ ฯ โส หิ อปริมิตอสงฺเขยฺยกปฺเป สมาจิตกุสลมูโล พฺราหฺมณกุลกุลิโน
หุตฺวา มานุสิรตึ อติโอหาย ธนวรํ ฉฑฺฑยิตฺวา ชินสาสเน ปพฺพชิตฺวา อิเมหิ เต
รสธุคงฺคคเณหิ กายวจีจิตฺตํ ทมยิตฺวา อชฺเชตรหิ อนนฺตคุณสมุเปโต ภควโต สาสเน

ธมฺมจกฺกํ อนุปวตฺตโก ชาโน ฯ ภาสิตํ เจตํ มหาราช ภควตา เทวาติเทเวน
เอกงฺคุตฺตรนิกายวรลญฺจเก
นาหํ ภิกฺขเว อญฺญํ เอกปุคฺคลมฺปิ สมนุปสฺสามิ โย เอวํ ตถาคเตน อนุตฺตรํ
ธมฺมจกฺกํ ปวตฺติตํ สมฺมเทว อนุปฺปวตฺเตติ ยถยิทํ ภิกฺขเว สารีปตฺโต สารีปุตฺโต ภิกฺขเว
ตถาคเตน อนุตฺตรํ ธมฺมจกฺกํ ปวตฺติตํ สมฺมเทว อนุปฺปวตฺเตตีติ ฯ เอวํ มหาราช ธุตงฺคคุณํ
อนนฺตคุณํ ปรํ เทตีติ ฯ
สาธุ ภนฺเต นาคเสน ยํ กิญฺจิ นวงฺคํ พุทฺธวจนํ ยา จ โลกุตฺตรา
กริยา ยา จ โลเก อธิคมวิปุลวรสมฺปตฺติโย สพฺพนฺตํ เตรสสุ ธุตงฺคคุเณสุ
สโมธาโนปคตนฺติ ฯ

ธุตงฺคปญฺโห นวโม ฯ

นวโม วคฺโค ฯ
เมณฺฑกปญฺโห นิฏฺฐิโต สมตฺโต ฯ